Gratë për të cilat mendoj gjatë natës

Mia KANKIMÄKI

Në librin Gratë për të cilat mendoj gjatë natës, Mia Kankimaki ndërthur shkrimet e udhëtimit, me kujtimet dhe biografinë. Ajo na rrëfen udhëtimet e saj magjepsëse në Japoni, Kenia dhe Itali, teksa përpiqet të gjejë pika takimi me rrugëtimin e dhjetë femrave frymëzuese të së shkuarës. Jetët e këtyre femrave nuk kanë ndjekur trajektoren tradicionale. Ato kanë thyer tabutë e barrierat dhe kanë arritur gjëra që kurrsesi nuk priteshin prej tyre. Një pjesë e mirë e tyre janë artiste dhe shkrimtare, femra me natyrë të tërhequr, që nuk kanë pasur familje apo fëmijë dhe marrëdhëniet e tyre me meshkujt kanë qenë të pazakonta. Ato kanë udhëtuar apo janë shpërngulur në vende e kultura të tjera dhe kanë mundur të revolucionarizojnë jetën e tyre edhe në moshë të kaluar.

Gratë për të cilat mendoj gjatë natës është pjesërisht një shkrim kushtuar udhëtimeve dhe pjesërisht një eksplorim emocionues i aventurave të grave të së shkuarës, të cilat sfiduan pritshmëritë me qëllimin për të parë – dhe për të ndryshuar – botën.